ሰቆቃው ኤርምያስ 3:1-64

¹አሌፍ። በቍጣው በትር መከራ ያየ ሰው እኔ ነኝ።

²ብርሃን ወደ ሌለበት ወደ ጨለማ መርቶ ወሰደኝ።

³ዘወትር ቀኑን ሁሉ እጁን በላዬ መለሰ።

⁴ቤት። ሥጋዬንና ቁርበቴን አስረጀ፥ አጥንቴን ሰበረ።

⁵ቅጥር ሠራብኝ በሐሞትና በድካምም ከበበኝ።

⁶ቀድሞ ሞተው እንደ ነበሩ በጨለማ አኖረኝ።

⁷ጋሜል። እንዳልወጣ በዙሪያዬ ቅጥር ሠራብኝ፤ ሰንሰለቴን አከበደ።

⁸በጠራሁና በጮኽሁ ጊዜ ጸሎቴን ከለከለ።

⁹መንገዴን በተጠረበ ድንጋይ ዘጋ፥ ጐዳናዬንም አጣመመ።

¹⁰ዳሌጥ። እንደሚሸምቅ ድብ እንደ ተሸሸገም አንበሳ ሆነብኝ።

¹¹መንገዴን ለወጠ፥ ገነጣጠለኝም፤ ባድማ አደረገኝ።

¹²ቀስቱን ገተረ ለፍላጻውም እንደ ጊጤ አደረገኝ።

¹³ሄ። የሰገባውን ፍላጻዎች በኵላሊቴ ውስጥ ተከለ።

¹⁴ለወገኔ ሁሉ ማላገጫ ቀኑንም ሁሉ መሳለቂያ ሆንሁ።

¹⁵ምሬት ሞላብኝ በእሬትም አጠገበኝ።

¹⁶ዋው። ጥርሴን በጭንጫ ሰበረ፥ በአመድም ከደነኝ።

¹⁷ነፍሴን ከሰላም አራቅህ፤ በጎ ነገርን ረሳሁ።

¹⁸እኔም። ኃይሌ ከእግዚአብሔርም ዘንድ ያለው ተስፋዬ ጠፋ አልሁ።

¹⁹ዛይ። መከራዬንና ችግሬን እሬትንና ሐሞትን አስብ።

²⁰ነፍሴ እያሰበችው በውስጤ ፈዘዘች።

²¹ይህችን በልቤ አኖራለሁ፥ ስለዚህ እታገሣለሁ።

²²ሔት። ያልጠፋነው ከእግዚአብሔር ምሕረት የተነሣ ነው፤ ርኅራኄው አያልቅምና።

²³ማለዳ ማለዳ አዲስ ነው፤ ታማኝነትህ ብዙ ነው።

²⁴ነፍሴ። እግዚአብሔር እድል ፈንታዬ ነው፤ ስለዚህ ተስፋ አደርገዋለሁ አለች።

²⁵ጤት። እግዚአብሔር በተስፋ ለሚጠብቁት ለምትሻውም ነፍስ መልካም ነው።

²⁶ሰው ዝም ብሎ የእግዚአብሔርን ማዳን ተስፋ ቢያደርግ መልካም ነው።

²⁷ሰው በታናሽነቱ ቀንበር ቢሸከም መልካም ነው።

²⁸ዮድ። እርሱ አሸክሞታልና ዝም ብሎ ለብቻው ይቀመጥ።

²⁹ተስፋ የሆነው እንደ ሆነ አፉን በአፈር ውስጥ ያኑር።

³⁰ጕንጩን ለሚመታው ይስጥ፥ ስድብንም ይጥገብ።

³¹ካፍ። ጌታ ለዘላለም አይጥልምና፤

³²ቢያሳዝንም እንደ ምሕረቱ ብዛት ይራራልና፤

³³የሰውን ልጆች ከልቡ አያስጨንቅም፥ አያሳዝንምም።

³⁴ላሜድ። በምድር የተጋዙትን ሁሉ ከእግሩ በታች ይረግጣቸው ዘንድ፥

³⁵የሰውን ፍርድ በልዑል ፊት ይመልስ ዘንድ፥

³⁶የሰውን ፍርድ ያጣምም ዘንድ ጌታ እሺ አይልም።

³⁷ሜም። ጌታ ያላዘዘውን የሚልና የሚፈጽም ማን ነው?

³⁸ከልዑል አፍ ክፉና መልካም ነገር አይወጣምን?

³⁹ሕያው ሰው የሚያጕረመርም፥ ሰው ስለ ኃጢአቱ ቅጣት የሚያጕረመርም ስለ ምንድር ነው?

⁴⁰ኖን። መንገዳችንን እንመርምርና እንፈትን፥ ወደ እግዚአብሔርም እንመለስ።

⁴¹ልባችንን ከእጃችን ጋር በሰማይ ወዳለው ወደ እግዚአብሔር እናንሣ።

⁴²በድለናል ዐምፀናልም፥ አንተም ይቅር አላልህም።

⁴³ሳምኬት። በቍጣ ከደንኸን አሳደድኸንም፤ ገደልኸን፥ አልራራህም።

⁴⁴ጸሎት እንዳያልፍ ራስህን በደመና ከደንህ።

⁴⁵በአሕዛብ መካከል ጕድፍና ውዳቂ አደረግኸን።

⁴⁶ዔ። ጠላቶቻችን ሁሉ አፋቸውን ኣላቀቁብን።

⁴⁷ድንጋጤና ቍጣ፥ ጥፋትና ቅጥቃጤ ሆነብን።

⁴⁸ስለ ወገኔ ሴት ልጅ ቅጥቃጤ ዓይኔ የውኃ ፈሳሽ አፈሰሰች።

⁵⁰ስለ ከተማዬ ቈነጃጅት ሁሉ ዓይኔ ነፍሴን አሳዘነች።

⁵¹ጻዴ። በከንቱ ነገር ጠላቶች የሆኑኝ እንደ ወፍ ማደንን አደኑኝ።

⁵²ሕይወቴን በጕድጓድ አጠፉ፥ በላዬም ድንጋይ ጣሉ።

⁵³በራሴ ላይ ውኆች ተከነበሉ፤ እኔም። ጠፋሁ ብዬ ነበር።

⁵⁴ቆፍ። አቤቱ፥ በጠለቀ ጕድጓድ ውስጥ ሆኜ ስምህን ጠራሁ።

⁵⁵ድምፄን ሰማህ፤ ጆሮህን ከልመናዬ አትመልስ።

⁵⁶በጠራሁህ ቀን ቀርበህ። አትፍራ አልህ።

⁵⁷ሬስ። ጌታ ሆይ፥ ስለ ነፍሴ ተምዋግተህ ሕይወቴን ተቤዠህ።

⁵⁸አቤቱ፥ ጭንቀቴን አይተሃል፥ ፍርዴን ፍረድልኝ።

⁵⁹በቀላቸውን ሁሉና በእኔ ላይ ያለውን አሳባቸውን ሁሉ አየህ።

⁶⁰ሳን። አቤቱ፥ ስድባቸውንና በእኔ ላይ ያለውን አሳባቸውን ሁሉ፥

⁶¹የተነሡብኝን ሰዎች ከንፈሮች ቀኑንም ሁሉ ያሰቡብኝን አሳባቸውን ሰማህ።

⁶²መቀመጣቸውንና መነሣታቸውን ተመልከት፤ እኔ መሳለቂያቸው ነኝ።

⁶³ታው። አቤቱ፥ እንደ እጃቸው ሥራ ፍዳቸውን ትከፍላቸዋለህ።

⁶⁴የልብ ዕውርነትንና እርግማንህን ትሰጣቸዋለህ።

⁶⁵አቤቱ፥ በቍጣ ታሳድዳቸዋለህ ከሰማይም በታች ታጠፋቸዋለህ።