Ayuba 35:1-16

¹Sai Elihu ya ce,

²“Ko kana tsammani wannan gaskiya ne? Kana cewa, ‘Ni mai adalci ne a gaban Allah.’

³Duk da haka kana tambayarsa cewa, ‘Wace riba nake da ita, kuma mene ne zan samu ta wurin ƙin yin zunubi?’

⁴“Zan so in ba ka amsa kai tare da abokanka.

⁵Ku ɗaga kai ku dubi sama ku gani; ku dubi gizagizai a samanku.

⁶In kun yi zunubi ta yaya wannan zai shafi Allah? In zunubanku sun yi yawa, me wannan zai yi masa?

⁷In kuna da adalci, me kuka ba shi, ko kuma me ya karɓa daga hannunku?

⁸Muguntarku takan shafi mutum kamar ku ne kaɗai, adalcinku kuma yakan shafi ’yan adam ne kaɗai.

⁹“Mutane suna kuka don yawan zalunci; suna roƙo don taimako daga hannu mai ƙarfi.

¹⁰Amma ba wanda ya ce, ‘Ina Allah wanda ya halicce ni, mai ba da waƙoƙi cikin dare,

¹¹wanda ya fi koya mana fiye da dabbobin duniya ya kuma sa muka fi tsuntsayen cikin iska hikima.’

¹²Ba ya amsawa lokacin da mutane suka yi kira don taimako domin girman kan mugaye.

¹³Lalle Allah ba ya sauraron roƙonsu na wofi; Maɗaukaki ba ya kula da roƙonsu.

¹⁴Ta yaya zai saurara sosai ko zai saurara lokacin da kake cewa ba ka ganinsa, cewa ka kawo ƙara a wurinsa kuma dole ka jira shi.

¹⁵Kuma ka ce, ba ya ba da horo cikin fushinsa ko kaɗan ba ya kula da mugunta.

¹⁶Saboda haka Ayuba ya buɗe baki yana magana barkatai; yana ta yawan magana ba tare da sani ba.”