Karin Magana 21:1-31

¹A hannun Ubangiji zuciyar sarki kamar ruwan rafi ne wanda yake bi da shi duk inda ya so.

²Mutum zai yi tunani hanyoyinsa daidai suke, amma Ubangiji yakan auna zuciya.

³Yin abin da yake daidai da kuma nagari Ubangiji ya fi yarda da shi fiye da hadaya.

⁴Girmankai da fariya, su ne fitilar mugaye, wannan kuwa zunubi ne!

⁵Shirye-shiryen mai aiki tuƙuru kan kai ga riba in kuwa ka cika gaggawa zai kai ga talauci.

⁶Dukiyar da aka samu ta wurin harshe mai yin ƙarya tarin tururi ne da kuma mugun tarko.

⁷Rikicin mugaye zai yi gāba da su, gama sun ƙi su yi abin da yake daidai.

⁸Hanyar mai laifi karkatacciya ce, amma halin marar laifi sukan aikata gaskiya.

⁹Gara a zauna a kusurwar rufin ɗaki da a zauna a gida ɗaya da mace mai fitina.

¹⁰Mugun mutum yakan zaƙu ya aikata mugunta; maƙwabcinsa ba ya samun jinƙai daga gare shi.

¹¹Sa’ad da aka hukunta mai ba’a marasa azanci suka yi wayo; sa’ad da aka yi wa mai hikima umarni yakan sami sani.

¹²Mai Adalci kan lura da gidan mugu kan kuma zama sanadin lalacin mugu.

¹³In mutum ya toshe kunnuwansa ga kukan matalauci, shi ma zai yi kukan neman taimako ba kuwa zai sami amsa ba.

¹⁴Kyautar da aka yi a asirce takan kwantar da fushi, kuma cin hancin da aka rufe a cikin riga kan tā da fushi mai tsanani.

¹⁵Sa’ad da aka yi adalci, yakan kawo farin ciki ga mai adalci amma fargaba ga masu aikata mugunta.

¹⁶Mutumin da ya kauce daga hanyar fahimi kan zo ga hutu a ƙungiyar matattu.

¹⁷Duk mai son jin daɗi zai zama matalauci; duk mai son ruwan inabi da mai ba zai taɓa zama mai arziki ba.

¹⁸Mugu kan zama abin fansa don adali, marar aminci kuma don mai aikata gaskiya.

¹⁹Gara a zauna a hamada da a zauna da mace mai fitina da kuma mugun hali.

²⁰A gidan mai hikima akwai wuraren ajiya na abinci da mai masu kyau, amma wawa kan cinye duk abin da yake da shi.

²¹Duk wanda ya nemi adalci da ƙauna kan sami rai, wadata da girmamawa.

²²Mutum mai hikima kan fāɗa wa birnin jarumawa ya kuma rushe katangar da suka dogara a kai.

²³Duk wanda yake lura da bakinsa da kuma harshensa kan kiyaye kansa daga masifa.

²⁴Mai girmankai da kuma mai fariya, “Mai ba’a” ne sunansa; yana yin abubuwa da girmankai ainun.

²⁵Marmarin rago zai zama mutuwarsa, domin hannuwansa sun ƙi su yi aiki.

²⁶Dukan yini yana marmari ya sami ƙari, amma mai adalci yakan bayar hannu sake.

²⁷Hadayar mugaye abin ƙyama ne, balle ma in aka kawo da mugun nufi!

²⁸Mai ba da shaidar ƙarya zai hallaka, kuma duk wanda ya saurare shi zai hallaka har abada.

²⁹Mugun mutum kan yi tsayin daka, amma mai aikata gaskiya kan yi tunani a kan abin da yake yi.

³⁰Babu hikima, babu tunani, babu shirin da zai yi nasara a kan Ubangiji.

³¹Akan shirya doki domin ranar yaƙi, amma nasara tana ga Ubangiji ne.