Zabura 107:1-43

¹Ku yi godiya ga Ubangiji, gama nagari ne shi; ƙaunarsa madawwamiya ce har abada.

²Bari fansassu na Ubangiji su faɗa wannan, su da aka fansa daga hannun maƙiyi,

³su da ya tattara daga ƙasashe, daga gabas da yamma, daga arewa da kudu.

⁴Waɗansu sun yi ta yawo a jejin hamada, ba su sami hanya zuwa birnin da za su zauna ba.

⁵Sun ji yunwa da ƙishirwa, suka kuma fid da zuciya.

⁶Sa’an nan suka yi kuka ga Ubangiji cikin wahalarsu, ya kuma cece su daga damuwarsu.

⁷Ya bishe su ta miƙaƙƙiyar hanya zuwa birnin da za su zauna.

⁸Bari su yi godiya ga Ubangiji saboda ƙaunarsa marar ƙarewa da kuma ayyukansa masu banmamaki saboda mutane,

⁹gama yana shayar da masu ƙishirwa yana kuma ƙosar da mayunwata da abubuwa masu kyau.

¹⁰Waɗansu sun zauna a cikin duhu da kuma zurfin ɓacin rai, ’yan kurkuku suna wahala cikin sarƙoƙin ƙarfe,

¹¹gama sun yi tayarwa a kan maganar Allah suka ƙi shawarar Mafi Ɗaukaka.

¹²Saboda haka ya ba da su ga aiki mai wuya; suka yi tuntuɓe, kuma ba mai taimako.

¹³Sa’an nan suka yi kuka ga Ubangiji cikin wahalarsu, ya kuwa cece su daga damuwarsu.

¹⁴Ya fitar da su daga duhu da zurfin ɓaci rai ya tsintsinke sarƙoƙinsu.

¹⁵Bari su yi godiya ga Ubangiji saboda ƙaunarsa marar ƙarewa da kuma ayyukansa masu banmamaki saboda mutane,

¹⁶gama ya farfashe ƙofofin tagulla ya kuma ragargaza ƙyamaren ƙarfe.

¹⁷Waɗansu suka zama wawaye ta wurin hanyoyinsu na tayarwa suka kuwa sha wahala saboda laifofinsu.

¹⁸Ba su so su ga abinci ba suka kuwa kai bakin mutuwa.

¹⁹Sa’an nan suka yi kuka ga Ubangiji cikin wahalarsu, ya kuwa cece su daga damuwarsu.

²⁰Ya ba da umarninsa ya kuma warkar da su ya kuɓutar da su daga kabari.

²¹Bari su yi godiya ga Ubangiji saboda ƙaunarsa marar ƙarewa da kuma ayyukansa masu banmamaki saboda mutane.

²²Bari su miƙa hadaya ta godiya su kuma ba da labarin ayyukansa da waƙoƙin farin ciki.

²³Waɗansu suka yi tafiya a teku cikin jiragen ruwa; su ’yan kasuwa ne a manyan ruwaye.

²⁴Sun ga ayyukan Ubangiji, ayyukansa masu banmamaki a cikin zurfin teku.

²⁵Gama ya yi magana ya kuma sa iska mai ƙarfi ta tashi ya ɗaga raƙuman ruwa sama.

²⁶Suka hau zuwa sammai suka kuma tsinduma cikin zurfafa; a cikin azabarsu sai ƙarfin halinsu ya karai.

²⁷Suka yi tangaɗi suna tuntuɓe kamar bugaggu; suka kuma kai ga ƙarshen dabararsu.

²⁸Sai suka yi kuka ga Ubangiji cikin wahalarsu, ya kuwa fitar da su daga damuwarsu.

²⁹Ya kwantar da hadiri suka yi tsit; raƙuman ruwan teku suka yi shiru.

³⁰Suka yi murna sa’ad da wuri ya kwanta, ya kuma bishe su zuwa inda suka so su kai.

³¹Bari su yi godiya ga Ubangiji saboda ƙaunarsa marar ƙarewa da kuma ayyukansa masu banmamaki saboda mutane.

³²Bari su ɗaukaka shi cikin taron mutane su kuma yabe shi cikin taron dattawa.

³³Ya mai da koguna suka zama hamada, maɓulɓulai masu gudu suka zama ƙasa mai ƙishirwa,

³⁴ƙasa mai amfani kuma suka zama gishiri marar amfani, saboda muguntar waɗanda suka zauna a can.

³⁵Ya mai da hamada ya zama tafkunan ruwa busasshiyar ƙasa kuma zuwa maɓulɓulai masu gudu;

³⁶a can ya kai mayunwata su yi zama, ya kuma samo birnin da za su zauna.

³⁷Suka yi shuka a gonaki suka dasa inabi suka kuma girbe amfani gona;

³⁸ya albarkace su, yawansu kuma ya ƙaru, bai kuwa bar garkunansu suka ragu ba.

³⁹Sa’an nan yawansu ya ragu, aka kuma ƙasƙantar da su ta wurin danniya, bala’i da kuma baƙin ciki;

⁴⁰shi da yake kawo reni a kan manyan mutane ya sa suka yi ta yawo a cikin jejin da ba hanya.

⁴¹Amma ya fid da mabukata daga wahalarsu ya kuma ƙara iyalansu da tumakinsu.

⁴²Masu yin gaskiya suka gani suka yi farin ciki amma dukan mugaye suka rufe bakunansu.

⁴³Duk mai hikima, bari yă ji waɗannan abubuwa yă kuma lura da ƙauna mai girma ta Ubangiji.