Zabura 34:1-22

¹Zan gode wa Ubangiji kullayaumi; yabonsa kullum za su kasance a leɓunana.

²Raina zai yi fariya a cikin Ubangiji; bari waɗanda suke wahala su ji su kuma yi farin ciki.

³Ku ɗaukaka Ubangiji tare da ni; bari mu ɗaukaka sunansa tare.

⁴Na nemi Ubangiji, ya kuwa amsa mini; ya cece ni daga dukan tsoro.

⁵Waɗanda suke dubansa sukan haskaka; fuskokinsu ba sa rufuwa da kunya.

⁶Wannan matalauci ya yi kira, Ubangiji kuwa ya ji shi; ya cece shi daga dukan wahalarsa.

⁷Mala’ikan Ubangiji ya kafa sansani kewaye da waɗanda suke tsoronsa, ya kuwa cece su.

⁸Ku gwada ku gani cewa Ubangiji yana da kyau; mai albarka ne mutumin da yake neman mafaka a gare shi.

⁹Ku ji tsoron Ubangiji, ku tsarkakansa, gama masu tsoronsa ba sa rasa kome.

¹⁰Zakoki za su iya rasa ƙarfi su kuma ji yunwa, amma waɗanda suke neman Ubangiji ba sa rasa abu mai kyau.

¹¹Ku zo, ’ya’yana, ku saurare ni; zan koya muku tsoron Ubangiji.

¹²Duk waninku da yake ƙaunar rayuwa yana kuma so yă ga kwanaki masu kyau,

¹³ka kiyaye harshenka daga mugunta da kuma leɓunanku daga faɗar ƙarairayi.

¹⁴Juyo daga mugunta ku yi alheri; nemi salama ku kuma yi ƙoƙarin samunta.

¹⁵Idanun Ubangiji suna a kan masu adalci kuma kunnuwansa suna sauraran kukansu;

¹⁶fuskar Ubangiji yana gāba da waɗanda suke aikata mugunta, don yă sa a manta da su a duniya.

¹⁷Adalai kan yi kuka, Ubangiji kuwa yakan ji su; yakan cece su daga dukan wahalarsu.

¹⁸Ubangiji yana kusa da waɗanda suka karai ya kuma cece waɗanda aka ragargaza a ruhu.

¹⁹Adali zai iya kasance da wahala da yawa, amma Ubangiji yakan cece shi daga dukansu;

²⁰yakan tsare dukan ƙasusuwansa, ba ko ɗayansu da zai karye.

²¹Mugunta zai kashe mugu; za a hukunta abokan gāban adalai.

²²Ubangiji yakan cece bayinsa; ba wanda yake neman mafaka a wurinsa da za a hukunta.