Zabura 72:1-20

¹Ka tanada sarki da shari’arka ta gaskiya, ya Allah, ɗan sarki da adalcinka.

²Zai shari’anta mutanenka da adalci, marasa ƙarfinka da shari’ar gaskiya.

³Duwatsu za su kawo wadata ga mutane, tuddai kuma su ba da amfani na adalci.

⁴Zai kāre marasa ƙarfi a cikin mutane yă kuma cece ’ya’yan masu bukata; zai murƙushe masu danniya.

⁵Zai jimre muddin rana tana nan, muddin akwai wata, har dukan zamanai.

⁶Zai zama kamar ruwan sama mai fāɗuwa a filin ciyayin da aka yanka, kamar yayyafi mai ba wa duniya ruwa.

⁷A kwanakinsa adalai za su haɓaka wadata za tă yalwata har sai babu sauran wata.

⁸Zai yi mulki daga teku zuwa teku kuma daga Kogi zuwa iyakar duniya.

⁹Kabilun hamada za su rusuna a gabansa abokan gābansa kuwa za su lashe ƙura.

¹⁰Sarakunan Tarshish da na bakin kogi masu nisa za su ba da gandu gare shi; sarakunan Sheba da Seba za su ba shi kyautai.

¹¹Dukan sarakuna za su rusuna masa kuma dukan al’ummai za su bauta masa.

¹²Gama zai ceci masu bukatan da suka yi kuka, marasa ƙarfin da ba su da mai taimako.

¹³Zai ji tausayin gajiyayyu da masu bukata yă ceci masu bukata daga mutuwa.

¹⁴Zai kuɓutar da su daga danniya da rikici, gama jininsu yake a gabansa.

¹⁵Bari yă yi doguwar rayuwa! Bari a ba shi zinariya daga Sheba. Bari mutane su riƙa yin addu’a dominsa su kuma albarkace shi dukan yini.

¹⁶Bari hatsi yă yalwata a duk fāɗin ƙasar; bari yă cika bisan tuddai. Bari ’ya’yan itatuwansa su haɓaka kamar Lebanon; bari yă bazu kamar ciyayi a gona.

¹⁷Bari sunansa yă dawwama har abada; bari yă ci gaba muddin rana tana nan. Dukan al’ummai za su sami albarka ta wurinsa, za su kuma ce da shi mai albarka.

¹⁸Yabo ya tabbata ga Ubangiji Allah, Allah na Isra’ila, wanda shi kaɗai ya aikata abubuwa masu banmamaki.

¹⁹Yabo ya tabbata ga sunansa mai ɗaukaka har abada; bari dukan duniya ta cika da ɗaukakarsa. Amin kuma Amin.

²⁰Wannan ya kammala addu’o’in Dawuda ɗan Yesse.