Mithali 14:1-35

¹Kila mwanamke aliye na hekima hujenga nyumba yake; Bali aliye mpumbavu huibomoa kwa mikono yake mwenyewe.

²Yeye aendaye kwa unyofu wake humcha Bwana; Bali aliye mkaidi katika njia zake humdharau.

³Katika kinywa cha mpumbavu mna fimbo ya kiburi, Bali midomo ya wenye hekima huwahifadhi.

⁴Zizi ni safi ambapo hapana ng'ombe; Bali nguvu za ng'ombe zaleta faida nyingi.

⁵Shahidi mwaminifu hatasema uongo; Bali shahidi wa uongo, pumzi zake ni uongo.

⁶Mwenye dharau hutafuta hekima, asiipate; Bali maarifa huwa mepesi kwa mwenye ufahamu.

⁷Toka mbele ya uso wa mpumbavu, Maana hutaona kwake midomo ya maarifa.

⁸Akili za mwenye busara ni kujua njia yake; Lakini upumbavu wa wapumbavu ni udanganyifu.

⁹Wapumbavu huidharau hatia; Bali upo upendeleo kwa wenye haki.

¹⁰Moyo huujua uchungu wa nafsi yake, Wala mgeni haishiriki furaha yake.

¹¹Nyumba ya mtu mbaya itabomolewa; Bali hema ya mwenye haki itafanikiwa.

¹²Iko njia ionekanayo kuwa sawa machoni pa mtu, Lakini mwisho wake ni njia za mauti.

¹³Hata wakati wa kucheka moyo huwa na huzuni; Na mwisho wa furaha ni uzito wa moyo.

¹⁴Ageukaye moyoni hushiba njia zake mwenyewe; Na mtu mwema ataridhika nafsini mwake.

¹⁵Mjinga huamini kila neno; Bali mwenye busara huangalia sana aendavyo.

¹⁶Mwenye hekima huogopa, akajitenga na uovu; Bali mpumbavu ana ufidhuli, na kujitumai.

¹⁷Yeye aonaye hasira upesi atatenda kwa ujinga; Na mtu mwenye hila mbaya huzirwa.

¹⁸Wajinga hurithi upumbavu; Bali wenye busara huvikwa taji ya maarifa.

¹⁹Wabaya huinama mbele ya wema, Na wasio haki malangoni mwao wenye haki.

²⁰Maskini huchukiwa hata na jirani yake; Bali tajiri ana rafiki wengi.

²¹Amdharauye mwenzake afanya dhambi; Bali amhurumiaye maskini ana heri.

²²Je! Hawakosi wawazao mabaya? Bali fadhili na kweli zina wao wawazao mema.

²³Katika kila kazi mna faida; Bali maneno ya midomo huleta hasara tu.

²⁴Taji ya wenye hekima ni mali zao; Bali upumbavu wa wajinga ni upumbavu tu.

²⁵Shahidi wa kweli huponya nafsi za watu; Bali atoaye uongo hudanganya.

²⁶Kumcha Bwana ni tumaini imara; Watoto wake watakuwa na kimbilio.

²⁷Kumcha Bwana ni chemchemi ya uzima, Ili kuepukana na tanzi za mauti.

²⁸Utukufu wa mfalme ni wingi wa watu wake; Bali uchache wa watu ni uharibifu wa mkuu wao.

²⁹Asiye mwepesi wa hasira ana fahamu nyingi; Bali mwenye roho ya hamaki hutukuza upumbavu.

³⁰Moyo ulio mzima ni uhai wa mwili; Bali husuda ni ubovu wa mifupa.

³¹Amwoneaye maskini humsuta Muumba wake; Bali yeye awahurumiaye wahitaji humheshimu.

³²Mtu mbaya husukumwa chini katika kutenda mabaya kwake; Bali mwenye haki ana matumaini katika kufa kwake.

³³Hekima hukaa katika moyo wake mwenye ufahamu; Bali yaliyo ndani ya wapumbavu hudhihirika.

³⁴Haki huinua taifa; Bali dhambi ni aibu ya watu wo wote.

³⁵Upendeleo wa mfalme humwelekea mtumwa atendaye kwa busara; Bali ghadhabu yake itakuwa juu yake aletaye aibu.