መዝሙረ ዳዊት 105:1-42

¹እግዚአብሔርን አመስግኑ ስሙንም ጥሩ፥ ለአሕዛብም ሥራውን አውሩ።

²ተቀኙለት፥ ዘምሩለት፥ ተአምራቱንም ሁሉ ተናገሩ።

³በቅዱስ ስሙ ተጓደዱ፤ እግዚአብሔርን የሚፈልግ ልብ ደስ ይበለው።

⁴እግዚአብሔርን ፈልጉት ትጸናላችሁም፤ ሁልጊዜ ፊቱን ፈልጉ።

⁶ባሪያዎቹ የአብርሃም ዘር፥ ለእርሱም የተመረጣችሁ የያዕቆብ ልጆች ሆይ፥ የሠራትን ድንቅ አስቡ፥ ተአምራቱን የአፉንም ፍርድ።

⁷እርሱ እግዚአብሔር አምላካችን ነው፤ ፍርዱ በምድር ሁሉ ነው።

⁸ቃል ኪዳኑን ለዘላለም፥ እስከ ሺህ ትውልድ ያዘዘውን ቃሉን አሰበ፥

⁹ለአብርሃም ያደረገውን፥ ለይስሐቅም የማለውን፤

¹⁰ለያዕቆብ ሥርዓት እንዲሆን ለእስራኤልም የዘላለም ኪዳን እንዲሆን አጸና።

¹¹እንዲህም አለ። ለአንተ የከነዓንን ምድር የርስታችሁን ገመድ እሰጣለሁ፤

¹²ይህም የሆነው እነርሱ በቍጥር ጥቂቶች ሰዎች፥ እጅግ ጥቂቶችና ስደተኞች ሲሆኑ ነው።

¹³ከሕዝብ ወደ ሕዝብ፥ ከመንግሥታትም ወደ ሌላ ሕዝብ አለፉ።

¹⁵በምድር ላይ ራብን ጠራ፥ የእህልን ኃይል ሁሉ ሰበረ።

¹⁶በፊታቸው ሰውን ላከ፤ ዮሴፍ ለባርነት ተሸጠ።

¹⁷እግሮቹም በእግር ብረት ደከሙ፥ እርሱም በብረት ውስጥ ገባ።

¹⁸ቃሉ እስኪመጣለት ድረስ፥ የእግዚአብሔር ቃል ፈተነው።

¹⁹ንጉሥ ላከ ፈታውም፥ የአሕዛብም አለቃ አስፈታው።

²⁰የቤቱ ጌታ፥ የጥሪቱ ሁሉ ገዢ አደረገው፥

²¹አለቆቹን እንደ ፈቃዱ ይገሥጽ ዘንድ፥ ሽማግሌዎቹንም ጥበበኞች ያደርጋቸው ዘንድ።

²²እስራኤልም ወደ ግብጽ ገባ፥ ያዕቆብም በካም አገር ተቀመጠ።

²³ሕዝቡንም እጅግ አበዛ፥ ከጠላቶቻቸውም ይልቅ አበረታቸው።

²⁴ሕዝቡን ይጠሉ ዘንድ በባሪያዎቹም ላይ ይተነኰሉ ዘንድ ልባቸውን ለወጠ።

²⁵ባሪያውን ሙሴን የመረጠውንም አሮንን ላከ።

²⁶የተኣምራቱን ነገር በላያቸው ድንቁንም በካም አገር አደረገ።

²⁷ጨለማን ላከ ጨለመባቸውም፤ በቃሉም ዐመፁ።

²⁸ውኃቸውን ወደ ደም ለወጠ፥ ዓሦቻቸውንም ገደለ።

²⁹ምድራቸው የንጉሦቻቸውም ቤቶች በጓጕንቸር ሞሉ።

³⁰ተናገረ፥ የውሻ ዝንብ ትንኝም በዳርቻቸው መጡ።

³¹ዝናባቸውን በረዶ አደረገው፥ እሳትም በምድራቸው ተቃጠለች።

³²ወይናቸውንና በለሳቸውን መታ፥ የአገራቸውንም ዛፍ ሁሉ ሰበረ።

³³ተናገረ፥ አንበጣም ስፍር ቍጥር የሌለውም ኩብኩባ መጣ፥

³⁴የአገራቸውንም ለምለም ሁሉ በላ፥ የምድራቸውንም ፍሬ በላ።

³⁵የአገራቸውንም በኵር ሁሉ፥ የጕልበታቸውን መጀመሪያ ሁሉ መታ።

³⁶ከወርቅና ከብርም ጋር አወጣቸው፥ በወገናቸውም ውስጥ ደዌ አልነበረም።

³⁷ፈርተዋቸው ነበርና ግብጽ በመውጣታቸው ደስ አላት።

³⁸ደመናን ለመሸፈኛ ዘረጋባቸው፥ እሳትንም በሌሊት ያበራላቸው ዘንድ ዘረጋ።

³⁹ለመኑ፥ ድርጭትንም አመጣላቸው፥ የሰማይንም እንጀራ አጠገባቸው።

⁴⁰ዓለቱን ሰነጠቀ፥ ውኃውም ፈሰሰ፤ ወንዞች በበረሃ ሄዱ፤

⁴¹ለባሪያው ለአብርሃም የነገረውን ቅዱስ ቃሉን አስቦአልና።

⁴²ሕዝቡንም በደስታ የተመረጡትንም በእልልታ አወጣ።

⁴³የአሕዛብንም አገሮች ሰጣቸው፥ የወገኖችንም ድካም ወረሱ፥

⁴⁴ሕጉን ይጠብቁ ዘንድ፥ ሥርዓቱንም ይፈልጉ ዘንድ። ሃሌ ሉያ