Zabura 46:1-11

¹Allah ne mafakarmu da ƙarfinmu, kullum yana a shirye yă taimaka a lokacin wahala.

²Saboda haka ba za mu ji tsoro ba, ko da ƙasa ta girgiza duwatsu kuma suka fāɗi cikin zurfin teku,

³ko da ruwansa suna ruri suna kumfa duwatsu kuma suna girgiza da tumbatsansu. Sela

⁴Akwai kogi mai rafuffukan da suke sa birnin Allah murna, tsattsarkan wuri inda Mafi Ɗaukaka ke zama.

⁵Allah yana cikinta, ba za tă fāɗi ba; Allah zai taimake ta da safe.

⁶Al’ummai suna hayaniya, mulkoki sun fāɗi; ya ɗaga muryarsa, duniya ta narke.

⁷Ubangiji Maɗaukaki yana tare da mu; Allah na Yaƙub ne kagararmu. Sela

⁸Zo ku ga ayyukan Ubangiji, kangon da ya kawo a kan duniya.

⁹Ya sa yaƙoƙi suka yi tsit ko’ina a duniya. Ya kakkarya bakkuna ya kuma ragargaza māsu, ya ƙone garkuwoyi da wuta.

¹⁰“Ku natsu ku kuma san cewa ni ne Allah; za a ɗaukaka ni a cikin al’ummai, za a ɗaukaka ni cikin duniya.”

¹¹Ubangiji Maɗaukaki yana tare da mu; Allah na Yaƙub ne kagararmu. Sela