Zabura 80:1-19

¹Ka ji mu, ya Makiyayin Isra’ila, kai da ka bishe Yusuf kamar garke. Kai da kake zaune a kursiyi tsakanin kerubobi, ka haskaka

²a gaban Efraim, Benyamin da Manasse. Ka tā da ƙarfinka; ka zo ka cece mu.

³Ka mai da mu, ya Allah; ka sa fuskarka ta haskaka a kanmu, za mu kuwa cetu.

⁴Ya Ubangiji Allah Maɗaukaki, har yaushe fushinka zai yi ta ƙuna a kan addu’o’in mutanenka?

⁵Ka ciyar da su da burodin hawaye; ka sa suka sha hawaye ta cikakken kwaf.

⁶Ka mai da mu abin faɗa ga maƙwabtanmu, kuma abokan gābanmu suna mana ba’a.

⁷Ka mai da mu, ya Allah Maɗaukaki; ka sa fuskarka ta haskaka a kanmu za mu kuwa cetu.

⁸Ka fitar da inabi daga Masar; ka kori al’ummai ka kuma dasa shi.

⁹Ka gyara wuri saboda shi, ya kuwa yi saiwa ya cike ƙasa.

¹⁰Aka rufe duwatsu da inuwarsa, manya-manyan itatuwan al’ul da rassansa.

¹¹Ya miƙe rassansa zuwa Teku tohonsa har zuwa Kogi.

¹²Me ya sa ka rurrushe bangayensa don duk masu wucewa su tsinke ’ya’yan inabinsa?

¹³Aladu daga kurmi suna ɓarnatar da shi halittun gonaki kuma suna cinsa.

¹⁴Ka komo wurinmu, ya Allah Maɗaukaki! Ka duba daga sama ka gani! Ka lura da wannan inabi,

¹⁵saiwar da hannun damarka ya dasa, ɗan da ka renar wa kanka.

¹⁶An yanke inabinka, an ƙone shi da wuta; a tsawatawarka mutanenka sun hallaka.

¹⁷Bari hannunka yă zauna a kan mutumin da yake hannun damarka, ɗan mutum da ka renar wa kanka.

¹⁸Ta haka ba za mu juye mu bar ka ba; ka rayar da mu, za mu kuwa kira bisa sunanka.

¹⁹Ka mai da mu, ya Ubangiji Allah Maɗaukaki; ka sa fuskarka ta haskaka a kanmu, za mu kuwa cetu.