Abụ Ọma 119:1-176

¹Ndị a gọziri agọzi ka ha bụ, bụ ndị ụzọ ha na-enweghị ihe ịta ụta ọbụla, ndị na-ejegharị dịka iwu Onyenwe anyị si dị.

²Ndị a gọziri agọzi ka ha bụ, bụ ndị na-edebe ụkpụrụ ya ma jirikwa obi ha niile na-achọsi ya ike.

³Ha adịghị eme ihe ọjọọ ọbụla; ha na-ejegharị nʼụzọ ya niile.

⁴I doola ụkpụrụ ndị a ga-erubekwara isi.

⁵Ọ ga-adị m mma ma ọ bụrụ na m anọgidesie ike na-erube isi nye iwu gị niile!

⁶Mgbe ahụ, ihere agaghị eme m mgbe m tulere uche nʼiwu gị niile.

⁷Aga m eji obi ziri ezi too gị dịka m na-amụ ihe banyere iwu gị ziri ezi.

⁸Aga m erubere iwu gị niile isi; biko ahapụkwala m.

⁹Olee ụzọ nwa okorobịa ga-esi bie ndụ dị nsọ? Ọ bụ site nʼibi ndụ dịka okwu gị si dị.

¹⁰Eji m obi m niile na-achọsi gị ike. Ekwela ka m kpafuo site nʼihe niile i nyere nʼiwu.

¹¹Ezoola m okwu gị niile nʼobi m, igbochi m imehie imegide gị.

¹²Otuto dịrị gị, o Onyenwe anyị; kuziere m iwu gị niile.

¹³Aga m eji egbugbere ọnụ m gụgharịa iwu niile nke si nʼọnụ gị.

¹⁴Ana m aṅụrị ọṅụ nʼịgbaso iwu gị niile dịka mmadụ si aṅụrị ọṅụ nʼime oke ịba ụba.

¹⁵Ana m atụgharị uche nʼụkpụrụ gị na-atulekwa uche nʼụzọ gị niile.

¹⁶Iwu gị na-amasị m; agaghị m elefu okwu gị anya.

¹⁷Meere ohu gị ihe ọma, ka m nwe ike dị ndụ; aga m erubere okwu gị isi.

¹⁸Kpughee anya m abụọ ka m hụ oke ihe ebube niile dị iche iche dị nʼime okwu gị.

¹⁹Abụ m onye ọbịa nʼelu ụwa; ezonarịla m iwu gị niile.

²⁰Nʼoge niile, ihe banyere iwu gị niile na-agụ mkpụrụobi m agụụ.

²¹Ị na-abara ndị mpako mba, ha bụ ndị a bụrụ ọnụ na ndị na-anaghị agbaso iwu gị.

²²Site nʼebe m nọ wepụ ịchị ọchị na nlelị, nʼihi na m na-edebe ụkpụrụ gị niile.

²³Nʼagbanyeghị na ndịisi nọkọrọ na-ekwulu m, ohu gị ga-atụgharị uche nʼiwu gị.

²⁴Ụkpụrụ gị niile bụ ihe na-amasị m; ha bụ ndị ndụmọdụ m.

²⁵Mkpụrụobi m na-arapara nʼuzuzu; kpọghachite ndụ m dịka okwu gị si dị.

²⁶Akọwaara m gị ụzọ m niile, ị zakwara m; ugbu a, kuziere m iwu gị.

²⁷Mee ka m ghọta ozizi ụkpụrụ gị; ka m nwe ike tụgharịa uche nʼọrụ ebube gị niile.

²⁸Iru ụjụ emeela ka mkpụrụobi m daa mba; gbaa m ume dịka okwu gị si dị.

²⁹Chebe m pụọ nʼụzọ aghụghọ niile; site nʼiwu gị meere m amara.

³⁰Ahọrọla m ụzọ ikwesi ntụkwasị obi; e kpebiela m idebe obi m nʼiwu gị niile.

³¹O Onyenwe anyị, ana m ejigidesi iwu gị niile aka ike; ekwela ka ihere mee m.

³²Aga m agbaso iwu gị niile nʼihi na i meela ka obi m nwere onwe ya.

³³O Onyenwe anyị, zi m ụzọ m ga-esi gbasoo iwu gị niile; mgbe ahụ, aga m edebe ha ruo nʼọgwụgwụ.

³⁴Nye m nghọta, aga m edebe iwu gị ma jiri obi m niile rubere ya isi.

³⁵Duo m nʼụzọ nke iwu gị niile, nʼihi na ọ bụ nʼime ha ka m na-achọta obi ụtọ.

³⁶Mee ka obi m chee ihu nʼiwu gị niile ọ bụghị nye uru na-esite nʼọchịchọ nke onwe.

³⁷Wepụ anya m site nʼihe na-abaghị uru; chebe ndụ m dịka okwu gị si dị.

³⁸Mezuo nkwa i kwere ohu gị, ka a tụọ egwu gị.

³⁹Wepụ nkọcha nke m na-atụ egwu ya, nʼihi na iwu gị niile ziri ezi.

⁴⁰Ụkpụrụ gị na-agụsị m agụụ ike! Chebe ndụ m site nʼezi omume gị.

⁴¹O Onyenwe anyị, ka ịhụnanya gị nke na-adịgide bịakwasị m, nzọpụta gị dịka nkwa i kwere si dị;

⁴²mgbe ahụ, aga m azaghachi onye ahụ na-achị m ọchị, nʼihi na ana m atụkwasị obi m nʼokwu gị.

⁴³Esitela nʼọnụ m napụ okwu nke eziokwu, nʼihi na olileanya m dị nʼiwu gị niile.

⁴⁴Aga m anọgide na-erubere iwu gị isi ruo mgbe ebighị ebi.

⁴⁵Aga m ejegharị nʼọnọdụ inwere onwe nʼihi na achọpụtala m ụkpụrụ gị niile.

⁴⁶Aga m ekwupụta banyere ụkpụrụ gị nʼihu ndị eze ma ihere agaghị eme m,

⁴⁷nʼihi na iwu gị na-amasị m nʼihi na ahụrụ m ha nʼanya.

⁴⁸Ana m eweliri iwu gị niile aka elu, bụ ndị m hụrụ nʼanya, ana m atụgharịkwa uche nʼiwu gị niile.

⁴⁹Cheta okwu i nyere ohu gị, nʼihi na i nyela m olileanya.

⁵⁰Nkasiobi m nʼime ịta ahụhụ m bụ nke a: nkwa gị na-echebe ndụ m.

⁵¹Ndị mpako na-akwa m emo na-esepụghị aka, ma anaghị m esite nʼiwu gị wezuga onwe m.

⁵²O Onyenwe anyị, ana m echeta iwu gị niile, ndị dị site na mgbe ochie, ha na-ewetara m nkasiobi.

⁵³Ana m ewe iwe nke ukwu nʼihi ndị ajọ omume, ndị gbakụtara iwu gị azụ.

⁵⁴Iwu gị niile bụ isi okwu abụ m ebe ọbụla m na-anọ.

⁵⁵Nʼabalị, o Onyenwe anyị, ana m echeta aha gị, aga m edebekwa iwu gị.

⁵⁶Nke a bụrịị ihe m na-eme oge niile: ana m erubere ụkpụrụ gị isi.

⁵⁷O Onyenwe anyị, ị bụ ihe nketa m; ekweela m nkwa irube isi nye okwu gị niile.

⁵⁸Ejirila m obi m niile chọọ ihu gị; meere m ebere dịka nkwa gị si dị.

⁵⁹Echeela m echiche banyere ụzọ m niile, chigharịakwa na-agbaso ụkpụrụ gị niile.

⁶⁰Aga m eme ngwangwa, agaghị atụfu oge irubere iwu gị niile isi.

⁶¹A sịkwarị na ndị ajọ omume ejiri ụdọ kee m agbụ, agaghị m echefu iwu gị.

⁶²Nʼetiti abalị, aga m ebili nye gị ekele nʼihi iwu gị niile ziri ezi.

⁶³Abụ m enyi ndị niile na-atụ egwu gị, ndị niile na-agbaso ụkpụrụ gị.

⁶⁴O Onyenwe anyị, ụwa niile jupụtara nʼịhụnanya gị; kuziere m iwu gị niile.

⁶⁵Meere ohu gị ihe ọma dịka okwu gị si dị, o Onyenwe anyị.

⁶⁶Zi m ihe ọmụma na ikpe ziri ezi nʼihi na ekwenyere m nʼiwu gị niile.

⁶⁷Tupu m nwee nsogbu, a kpafuru m, ma ugbu a, ana m erubere okwu gị isi.

⁶⁸I dị mma, ihe i na-eme ziri ezi; kuziere m iwu gị niile.

⁶⁹Nʼagbanyeghị na ndị mpako a gbasaala okwu ụgha techie m, ana m eji obi m niile na-edebe ụkpụrụ gị.

⁷⁰Obi ha siri ike, ọ dịghị ihe na-emetụta ha, ma ana m enwe mmasị nʼiwu gị.

⁷¹Ọ dị mma na m tara ahụhụ ka m nwee ike mụta iwu gị niile.

⁷²Iwu si nʼọnụ gị pụta dị oke ọnụahịa nye m karịa imerime puku ọlaọcha na ọlaedo.

⁷³Aka gị kere m, kpụọkwa m; nye m nghọta ka m mụta iwu gị niile.

⁷⁴Ka ndị na-atụ egwu gị ṅụrịa mgbe ha hụrụ m, nʼihi na olileanya m dị nʼokwu gị.

⁷⁵O Onyenwe anyị, amaara m na iwu gị niile ziri ezi, ọ bụkwa nʼikwesị ntụkwasị obi ka ị tara m ahụhụ.

⁷⁶Ka ịhụnanya gị nke na-adịghị agwụ agwụ kasịe m obi, dịka nkwa i kwere ohu gị si dị.

⁷⁷Ka ọmịiko gị bịakwasị m, ka m nwee ike dị ndụ, nʼihi na iwu gị na-amasị m.

⁷⁸Ka ihere mee ndị mpako nʼihi ihe ọjọọ ha mere m na-enweghị ihe m mere; ma aga m atụgharị uche nʼụkpụrụ gị.

⁷⁹Ka ndị niile na-atụ egwu gị bịakwute m, ndị na-aghọta ụkpụrụ gị niile.

⁸⁰Ka m were obi zuruoke na-agbaso ụkpụrụ gị niile, ka ihere ghara ime m.

⁸¹Mkpụrụobi m na-ada mba site nʼọchịchọ ya maka nzọpụta gị, ma olileanya m dị nʼokwu gị.

⁸²Anya na-egbu m mgbu ebe m na-ele anya nkwa gị; ana m asị, “Olee mgbe ị ga-akasị m obi?”

⁸³Nʼagbanyeghị na adị m ka karama akpụkpọ nke dị nʼanwụrụ ọkụ, anaghị m echefu iwu gị niile.

⁸⁴Ruo olee mgbe ka ohu gị ga-anọgide na-eche? Olee mgbe ka ị ga-ata ndị na-akpagbu m ahụhụ?

⁸⁵Ndị mpako na-egwuru m olulu, bụ ihe nke na-adịghị ka iwu gị si dị.

⁸⁶Iwu gị niile kwesiri ntụkwasị obi; nyere m aka, nʼihi na ndị mmadụ na-akpagbu m ma o nweghị ihe m mere ha.

⁸⁷Ọ fọdụrụ ntakịrị ihe, ha gaara ala m nʼiyi, ma agbakụtaghị m ụkpụrụ gị azụ.

⁸⁸Site nʼịhụnanya gị nke na-adịgide chebe ndụ m, ka m nwe ike rube isi nʼiwu nke ọnụ gị.

⁸⁹O Onyenwe anyị, okwu gị na-adịgide ruo mgbe ebighị ebi; ọ na-eguzosi ike nʼeluigwe.

⁹⁰Ikwesi ntụkwasị obi gị na-adịgide site nʼọgbọ ruo nʼọgbọ; ọ bụ gị kere ụwa, ọ na-eguzosikwa ike.

⁹¹Ruo taa, iwu gị niile na-eguzosi ike, nʼihi na ihe niile na-ejere gị ozi.

⁹²A sịkwarị na iwu gị anaghị amasị m, agaara m anwụ nʼime nsogbu m.

⁹³Agaghị m echefu ụkpụrụ gị niile, nʼihi na ọ bụ ha ka i ji chebe ndụ m.

⁹⁴Zọpụta m, nʼihi na abụ m nke gị; achọpụtala m ụkpụrụ gị niile.

⁹⁵Ndị ajọ omume na-eche ịla m nʼiyi, ma aga m atụgharị uche nʼụkpụrụ gị.

⁹⁶Ana m ahụ nsọtụ ihe niile zuruoke, ma iwu gị niile enweghị nsọtụ.

⁹⁷O, otu m si hụ iwu gị nʼanya! Ana m atụgharị uche na ya ogologo ụbọchị niile.

⁹⁸Iwu gị na-eme ka amamihe m karịa nke ndị iro m, ha na-anọnyere m oge niile.

⁹⁹Enwere m nghọta karịa ndị na-ezi m ihe, nʼihi na ana m atụgharịa uche nʼiwu gị niile.

¹⁰⁰Enwere m nghọta karịa ndị okenye nʼihi na ana m erubere ụkpụrụ gị niile isi.

¹⁰¹Ajụrụ m ajụ ije ije nʼụzọ ọjọọ ọbụla ka m nwee ike rubere okwu gị isi

¹⁰²Ewezugaghị m onwe m nʼiwu gị niile, nʼihi na ọ bụ gị onwe gị ziri m ha.

¹⁰³Lee ka okwu gị niile si atọ m ụtọ, ha dị ụtọ nʼọnụ m karịa mmanụ aṅụ!

¹⁰⁴A na-enweta nghọta site nʼụkpụrụ gị niile; ya mere ana m akpọ ụzọ ọjọọ ọbụla asị.

¹⁰⁵Okwu gị bụ oriọna dịrị ụkwụ m bụrụkwa ìhè nʼụzọ m.

¹⁰⁶Aṅụọla m iyi, mee ka o guzosie ike, na aga m agbaso iwu ezi omume gị niile.

¹⁰⁷Ataala m ahụhụ nke ukwuu; chebe ndụ m, o Onyenwe anyị, dịka okwu gị si dị.

¹⁰⁸O Onyenwe anyị, nabata otuto afọ ofufu niile nke si nʼọnụ m, kuziekwara m iwu gị niile.

¹⁰⁹Mkpụrụobi m na-adị m nʼọbụaka m oge niile, ma echezọghị m iwu gị.

¹¹⁰Ndị ajọ omume esielera m ọnya, ma esitebeghị m nʼụkpụrụ gị kpafuo.

¹¹¹Iwu gị niile bụ ihe nketa m ruo mgbe ebighị ebi; ha bụ ihe na-enye obi m ọṅụ.

¹¹²Obi m ekpebiela idebe ụkpụrụ gị ruo na ngwụcha.

¹¹³Ana m akpọ ndị na-enwe obi abụọ asị, ma ahụrụ m iwu gị nʼanya.

¹¹⁴Ị bụ ebe mgbaba m na ọta m; olileanya m dị nʼokwu gị.

¹¹⁵Sitenụ nʼebe m nọ pụọ, unu ndị na-eme ihe ọjọọ, ka m nwee ike idebe iwu niile nke Chineke m!

¹¹⁶Gbaa m ume dịka nkwa gị si dị, aga m adịkwa ndụ; ekwekwala ka olileanya m daa.

¹¹⁷Kwagide m, aga m abụ onye a gbapụtara; aga m anọgide na-asọpụrụ iwu gị niile.

¹¹⁸Ị na-ajụ ndị niile na-adịghị edebe iwu gị, nzube aghụghọ ha niile bụ ihe na-enweghị isi.

¹¹⁹Ị na-ekpochapụ ndị ajọ omume dịka unyi a na-ekpofu ekpofu; nʼihi ya, ahụrụ m ụkpụrụ gị niile nʼanya.

¹²⁰Anụ ahụ m na-ama jijiji nʼihi ịtụ egwu gị; ana m eguzo nʼoke egwu nʼihi iwu gị niile.

¹²¹Emeela m ihe dị mma na ihe ziri ezi; ahapụkwala m nʼaka ndị na-emegbu m.

¹²²Kwee ohu gị nkwa na ị ga-elekọta ya; ekwela ka ndị mpako kpagbuo m.

¹²³Anya na-egbu m mgbu ebe m na-ele anya nzọpụta gị ebe m na-ele anya nkwa gị ziri ezi.

¹²⁴Biko mesoo ohu gị mmeso dịka ịhụnanya gị si dị ma kuziekwara m ụkpụrụ gị niile.

¹²⁵Abụ m ohu gị, nye m nghọta, ka m nwee ike mara ụkpụrụ gị niile.

¹²⁶O Onyenwe anyị, oge eruola mgbe ị ga-arụ ọrụ, nʼihi na a na-emebi iwu gị.

¹²⁷Nʼihi na ahụrụ m iwu gị niile nʼanya karịa ọlaedo, e karịa ọlaedo a nụchara anụcha,

¹²⁸nʼihi na m na-ahụta ụkpụrụ gị niile ka ihe ziri ezi, akpọrọ m ụzọ niile na-ezighị ezi asị.

¹²⁹Iwu gị niile dị ịtụnanya; ya mere, ana m erubere ha isi.

¹³⁰Mkpughepụ na nkọwa nke okwu gị na-enye ìhè; ọ na-eme ka ndị na-enweghị uche ghọta ihe.

¹³¹Ana m asaghe ọnụ m na-ekupụ ume ike ike, na-achọsi iwu gị niile ike.

¹³²Chee m ihu, meere m ebere, dịka i si emere ndị niile hụrụ aha gị nʼanya ebere.

¹³³Mee ka nzọ ụkwụ m niile na-aga dịka okwu gị si dị; ekwela ka mmehie chịa m.

¹³⁴Gbapụta m site nʼaka ndị na-emegbu m, ka m nwee ike debe iwu gị.

¹³⁵Mee ka ihuọma gị dịkwasị nʼahụ ohu gị. Kuziere m ụkpụrụ gị niile.

¹³⁶Anya mmiri akwa na-agba m nke ukwuu nʼihi na ndị mmadụ adịghị erube isi nye iwu gị.

¹³⁷O Onyenwe anyị, ị bụ onye ezi omume, iwu gị niile zikwara ezi.

¹³⁸Ụkpụrụ gị niile ziri ezi; ha kwesiri ntụkwasị obi.

¹³⁹Nʼihi na ndị iro m na-elefu okwu gị anya, ịnụ ọkụ nʼobi m na-ada mba.

¹⁴⁰Nkwa gị niile bụ ihe enyochara nke ọma, ohu gị na-ahụkwa ha nʼanya.

¹⁴¹Ọ bụ ezie na m bụ onye dị ala, na onye a na-eleda anya, ma adịghị m eleda ụkpụrụ gị niile anya.

¹⁴²Ezi omume gị na-adị ruo mgbe ebighị ebi. Iwu gị niile bụkwa eziokwu.

¹⁴³Nsogbu na ihe mgbu adakwasịla m, ma iwu gị niile bụ ihe na-amasị m.

¹⁴⁴Iwu gị niile bụ ezi omume ruo mgbe ebighị ebi; nye m nghọta, ka m nwe ike dị ndụ.

¹⁴⁵Eji m obi m niile na-akpọ oku; zaa m o Onyenwe anyị, aga m erubekwa isi nye ụkpụrụ gị niile.

¹⁴⁶Ana m akpọku gị; zọpụta m aga m erube isi nye ụkpụrụ gị niile.

¹⁴⁷Tupu chị na-abọ, ana m ebili, na-akwa akwa maka enyemaka; olileanya m dị nʼokwu gị.

¹⁴⁸Ana m amụ anya abalị nʼelu ihe ndina m, nʼihi ịtụgharị uche na nkwa gị niile.

¹⁴⁹Nụrụ olu m dịka ịhụnanya gị si dị; chebe ndụ m, o Onyenwe anyị, dịka iwu gị niile si dị.

¹⁵⁰Ndị na-atụpụta atụmatụ ọjọọ nọ nso ma ha nọ iwu gị niile nʼebe dị anya.

¹⁵¹Ma ị nọ nso, Onyenwe anyị; ihe niile i nyere nʼiwu bụ eziokwu.

¹⁵²Site na mgbe ochie ka m mụtara site nʼụkpụrụ gị, na i mere ka ha guzosie ike ruo mgbe ebighị ebi.

¹⁵³Ledata anya ka ị hụ ịta ahụhụ m ma gbapụta m, nʼihi na echefughị m iwu gị.

¹⁵⁴Kpepụta m, gbapụta m, chebe ndụ m dịka nkwa gị si dị.

¹⁵⁵Nzọpụta dị anya nʼebe ndị na-eme ihe ọjọọ nọ, nʼihi na ha anaghị agbaso ụkpụrụ gị niile.

¹⁵⁶O Onyenwe anyị, ọmịiko gị dị ukwuu; chebe ndụ m dịka iwu gị niile si dị.

¹⁵⁷Ndị iro m na ndị na-akpagbu m dị ọtụtụ, ma aga m anọgide na-edebe iwu gị.

¹⁵⁸Ana m asọ ndị niile na-enweghị okwukwe nʼime gị oyi, nʼihi na ha anaghị erubere okwu gị isi.

¹⁵⁹Lee ka m si hụ ụkpụrụ gị niile nʼanya; chebe ndụ m, o Onyenwe anyị, dịka ịhụnanya gị si dị.

¹⁶⁰Okwu gị niile bụ eziokwu; iwu gị niile ziri ezi na-adịgide ruo mgbe ebighị ebi.

¹⁶¹Ndịisi na-emegbu m na-enweghị ihe m mere, ma obi m na-ama jijiji nʼihi okwu gị.

¹⁶²Ana m aṅụrị ọṅụ nʼime nkwa gị dịka onye chọtara ọtụtụ ihe nkwata nʼagha.

¹⁶³Akpọrọ m okwu ụgha asị, ọ bụkwa ihe arụ nʼebe m nọ, ma ahụrụ m iwu gị nʼanya.

¹⁶⁴Aga m eto gị ugboro asaa nʼụbọchị, nʼihi iwu gị ziri ezi.

¹⁶⁵Ndị hụrụ iwu gị nʼanya nwere udo dị ukwuu, ọ dịghị ihe ga-eme ka ha sụọ ngọngọ.

¹⁶⁶Ana m echere nzọpụta gị, o Onyenwe anyị, na-agbasokwa iwu gị niile.

¹⁶⁷Ana m erubere ụkpụrụ gị niile isi nʼihi na m hụrụ ha nʼanya nke ukwuu.

¹⁶⁸Ana m erubere ụkpụrụ na iwu gị niile isi, nʼihi na ị maara ụzọ m niile.

¹⁶⁹Ka akwa m ruo gị ntị, o Onyenwe anyị; nye m nghọta dịka okwu gị si dị.

¹⁷⁰Ka arịrịọ m ruo gị ntị; gbapụta m dịka nkwa gị si dị.

¹⁷¹Ka ọnụ m jupụta nʼotuto, nʼihi na ị na-ezi m iwu gị niile.

¹⁷²Ka m jiri ire m bụọ abụ banyere okwu gị, nʼihi na iwu gị niile ziri ezi.

¹⁷³Nọọ na njikere oge niile inyere m aka, nʼihi na ahọrọla m ụkpụrụ gị niile.

¹⁷⁴Ana m ele anya nzọpụta gị, o Onyenwe anyị, iwu gị bụ ihe na-amasị m.

¹⁷⁵Kwere ka m dịrị ndụ ka m nwee ike ito gị, ka iwu gị niile gbaa m ume.

¹⁷⁶Akpafuola m dịka atụrụ nke furu efu, chọọ ohu gị, nʼihi na echefubeghị m iwu gị niile.